y61qlvyrlqihxdmncejhq_thumb_99e-2
Trofeo

Texto ganador del II concursu de microrrellatos “L’Horreo del Carbayedo”

La madre Daniel mira la hora impaciente. El rapaz retrásase. Otru día más que s’entretién en parque. Dende que’l padre coló de casa nun fala pallabra, pero tolos díes quier salir. Eso ayúdala a despreocupase un poco d’él mientres va a trabayar al Súper. Güei son les tres y media y el rapacín ensin llegar. Siempre anda apurada pa dir peles tardes a cuidar a Don Erasmo. Oye meter la llave na ferradura. ¡Por fin!

—Ya diba siendo hora, Daniel. Toi farta decite que nun te retrases, que tengo mieu que te pase dalgo.

Alsina ta na cama, lleva una selmana ensin poder salir d’ella. Entós entovía podía dir al bañu, agora ya ni eso. De sólu pensalo ya s’afuega. El corazu nun-y da pa más. ¡Nun tuvo mal!, cuántos firmaríen por haber tenío la so vida. Déxalo too n’orde, polo menos eso creye. Sólo una cosa nun depende por entero d’ella. Anque tamién la tien prevista. Berta y ella tiénenla falada ya.

—¿Tas ehí? Ya me duraba. ¿Ficiste lo que alcordamos? Pasa pa equí. ¿Taba’l rapacín de la mirada murnia? ¿Güei tamién-y engaloyeste’l día? —prengunta Alsina espurriendo la mano hacia Berta.

Entra Pilara na habitación. Acércase a la cama so madre. Da-y un besu na frente mientres-y cueyi la otra mano ente les suyes.

—Bonos díes mama. Díxome Rosa que güei dormiste bien. ¿Cómo tas agora?

—Sin aliendu, filya. A esti corazón yá-y queda poco.

—D’eso nada, tovía ti queda muncho por trollar. ¿Y tú Berta, guapa, cómo tas?

—Taba cuntándome que tuvo en parque’l Carbayedo.

—¡Mira que vos entendéis bien! Creo, mama, que ye lo que más quies.

Ta una mañana soleyera, y eso que cuenten que cuando muerre una bona persona al cielu-y da por bramar. Nesti casu nun ye asina, el sol d’agostu relluma no cimero mientres meten la caxa Alsina nel panteón.

—¡Berta!, ¿qué faes? Equí nun pues tar. Ven, vamos fuera.

Pilara agáchase pa coyer a Berta que-y clava los güeyos estrozaos de dolor. Da-y pena d’ella, lleva diez años ensin separtase d’Alsina.

—Nun te preocupes, vas tar bien conmigo y con Xandru; yá lo verás. Agora vas vivir na aldea como una reina, colo que ti presta —díxi-y intentando consolar onde nun hai consuelu.

—¡Ma, ya llegué! —da-y por dicir güei a Daniel al tornar a casa—. Traigo compaña.

La madre Daniel seca les manes nel mandil. Una emoción rara-y solmena les coraes. Per primera vez en seis meses la voz del so fiyu suena aliella como antaño.

—¡Pero qué traes ehí! —esclama la madre Daniel sin poder creyer lo que ve.

—Tolos díes ta conmigo, mamina. Nun se separta de mí va un mes. Enantes andaba siempre con una señora, pero oí que morrió.

La voz de Daniel tresmite ilusión, la mirada esperanza.

—¿Cómo se llama?

—Nel collar pon «Berta».

Flora del Valle

Avilés, 3 d’agostu de 2008

Ilustración: Rob Carey
PRENSA:
“La asociación de vecinos entregará los premios del concurso de microrrelatos […] El primer premio, dotado con 300 euros y trofeo, es para el cuento «La última voluntá», de Elma S. Vega.”
La Nueva España, martes 19 de agosto de 2008

OLYMPUS DIGITAL CAMERA
http://www.lne.es/aviles/2008/08/19/carbayedo-prepara-cuatro-dias-fiesta-culminaran-vicente-diaz/667311.html

"Elma Sánchez Vega [...], ganadores de "El Correo del Carbayedo"
tierraalantre.wordpress.com, nº 14

dscn7939-2-2
https://tierraalantre.wordpress.com/2008/08/13/elma-sanchez-vega-josa-angel-gayol-hactor-parez-iglesias-y-luisa-mandez-ganadores-daeaeoeel-harreo-del-carbayedoae/